Krite Grou hat it winterprogram klear
GROU - Kulturiele feriening Krite Grou hat it winterprogram foar 2019-2020 bekind makke. It seizoen wordt iepene op sneon 12 oktober troch Tryater mei Raze om protters (wannear’t it genôch is). Dizze foarstelling oer Doede, in jonge mei in licht ferstanlike beheining, wurdt spile by Van Vuuren.
J&M Teaterwurk fan Jan Arends en Marijke Geertsma spilet op freed 25 oktober De man fan dyn libben, in tragikomeedzje fol leafde en wraak. It giet oer in sike frou dy’t net wer better kin. Om har man goed achter te litten, siket se in nije leafde foar him.
Yn Taal op it spoar op 22 novimber stiet de Grouster komponist Cees Bijlstra sintraal. Ald fedette Leny Dijkstra en Hiske Oosterwijk treffe mekoar yn de Cees Bijlstra-trein fan Arriva. Dy trein draacht de namme fan Leny har ferstoarne freon, komponist en begelieder dêr't se sa lang mei wurke hat. Hiske stapt by tafal yn de Cees Bijlstra-trein. Se fertelle en sjonge harren libbensferhaal mei selsspot en humor.
Praatprogramma RUR hiet tenei RUG (Rjochtstreeks Ut Grou). Op sneintemoarn 15 desimber presintearret Freark Smink de earste, mei trije bysûndere gasten; Douwe Visser, ús mearfâldich Grouster SKS-skûtsjekampioen; Riemer van der Velde, de man dy’t SC Hearrenfean grut makke hat en him dêr noch altyd tige mei ferbûn fielt en Jos Thie, regisseur fan tal fan grutte teaterproduksjes.
It Grouster Kritetoaniel spilet Eurohotel keamer 719, ûnder rezjy fan Wybe Koldyk. It binne twa ferhalen op ien hotelkeamer. Freed 17, sneon 18 en snein 19 jannewaris 2020 by restaurant Oan ’t Wetter.
Snein 15 maart is der in Kofjekonsert mei Grytz & Grize. Mei stipe fan twa muzikanten sjonge se eigen Frysktalige lieten en in tal Ingelsktalige covers. Ek krije we in pear nûmers fan it projekt ‘Boudewijn de Groot yn it Frysk’ te hearren.
Foar it earst offisjeel yn it Kriteprogramma opnommen: in jûn mei ienakters troch it eigen jeugdtoaniel. Der is yn 2018 en ’19 hurd wurke om yn Grou it jeugdtoaniel fan de grûn te krijen. In entûsjaste ploech jonges en famkes hat toanielworkshops folge. En mei súkses! Sneon 28 maart 2020 by Oan ’t Wetter.
De kaartferkeap foar alle foarstellings begint 1 septimber fia kritegrou.nl.
